Çfarë është?
Menopauza është ajo periudhë e jetës së femrës në të cilën menstruacionet pushojnë dhe nuk vijnë më kurrë. Menopauza është pjesë e procesit natyral të plakjes tek femra. Kjo ndodh pasi në trupin e femrës nuk do të prodhohen më ovocite (vezë) dhe hormonet estrogjen dhe progesterone. Kjo do të bëjë që femra ta ketë të pamundur shtatëzaninë.
Kur ndodh?
Mosha mesatare në të cilën femrat hyjnë në menopauzë është 52 vjeç. Megjithatë ajo mund të variojë nga 42 në 56 vjeç. Menopauza instalohet kur një femër në këtë moshë ka një vit pa menstruacione.
Simptomat
Menopauza duke qenë një pjesë normale e jetës së femrës nuk duhet të konsiderohet si sëmundje apo si problem. Megjithatë, disa femra e kanë të veshtirë të përjetojnë dhe të ambientohen me simptomat e saj që shkaktohen nga mungesa e hormoneve.
Shenja kryesore është ndryshimi në menstruacione të cilat bëhen të çrregullta (shumë afër ose shumë larg, si edhe ndryshimi i fluksit (pakësohet ose bëhet më i bollshëm), duke bërë që më pas periodat të ndalojnë totalisht.
Simptoma të tjera mund të jenë:
– Pagjumësia;
– Shtim në peshë;
– Djersitja;
– Afshet e nxehta;
– Lodhja;
– Dhimbje të kyçeve;
– Tharje të vaginës;
– Probleme me kujtesën;
– Infeksionet urinare;
– Luhatjet e humorit;
– Kruarjet e lëkurës;
– Gjendje depresioni;
– Osteoporoza;
– Problemet e zemrës.
Si të përgatitemi për menopauzën?
Menopauza është një stad i rëndësishëm në jetën e femrës. Për disa mund të jetë një periudhë e vështirë e pasur me probleme fizike dhe emocionale. Për disa të tjera ajo është një periudhë rilindje.
Ja çfarë duhet të bëni:
– Mos konsumoni duhan;
– Ndiqni një dietë të shëndetshme me pak yndyrna, shumë fibra, shumë fruta dhe perime;
– Sigurohuni që të merrni sa duhet kalçium dhe vitaminë D, përmes dietës ose përmes medikamenteve që mund të përshkruajë mjeku;
– Ushtroni aktivitet fizik të vazhdueshëm;
– Konsumoni sa më shumë lëngje;
– Konsumoni sa më shumë pije të ftohta kur shfaqet afshi i nxehtë;
– Përdorni veshje të lirshme në mënyrë që lëkura të ajroset;
– Përdorni lubrifikantë vaginalë me përmbajtje estrogjeni;
– Bëni vizitë tek mjeku.