Një histori e rëndë tronditi pasditen e djeshme opinionin publik, pasi një 13-vjeçare u shpall e rrëmbyer nga familjarët dhe policia.
E mitura sapo ishte kthyer nga shkolla, kur sipas motrës së saj më të vogël dy të rritur me një makinë të kuqe Fiat Punto, pritën deri sa ajo të zbriste nga furgoni ishkollës dhe e morën me forcë.
Motra e vogël shkoi në shtëpi dhe i tregoi gjyshes së saj ndërsa prindërit nxituan të bënin denoncimin në polici dhe media, pasi vajza vuante nga diabeti dhe duhet të bënte insulinën në darkë.
Por e gjitha rezultoi të ishte një sajesë e adoleshentes, e cila pohoi se e kishte thurur gjithë ngjarjen për të dalë me shokët dhe shoqet pasi prindërit nuk e linin të dilte.
Ditën e sotme shokët e ngushtë kanë folur për ABC news dhe kanë treguar se adoleshentja kishte disa ditë që e ideonte planin e ikjes nga shtëpia, si shenjë e hakmarrjes ndaj prindërve.
Shkak ishte mosdhënia e lejes dhe parave për të shkuar te ditëlindja e shoqes së adoleshentes.
“Me makinë të kuqe, i kishin mbuluar dhe targat. Kështu neve na e tha motra e vet. Ajo na e ka shpjeguar të gjithë ngjarjen. E kishte mbuluar fytyrën me një leckë dhe e kishin futur në makinë mbrapa. Ishte me dy shoqe në një kafe atje”, tha një nga shoqet e vajzës.
“Thanë që e kishte bërë plan me motrën, ditë mbas dite, deri sa të vinte ditëlindja, dhe thoshte që e ndiqnin disa njerëz. Motra e vet tha që e rrëmbyen dhe u fut në një makinë që e ngiste babi i shoqes vetë që do t’i çonte te ditëlindja”, tregoi një nga shokët e vajzës.
E mitura kishte disa ditë që kërkonte leje dhe para për të shkuar te ditëlindja e shoqes së saj të ngushtë, por kishte marrë refuzimin e prerë nga familjarët.
Veprmi i të resë i ka lënë pafjalë shokët e saj.
Të bindur se bashkëmoshatarja e tyre nuk ka vepruar mirë, fëmijët tregojnë edhe kur folën në telefon me vajzën.
Banorët janë të shokuar. Prania e kameras i bën të nervozë dhe komentet janë të pakta.
Drejtoria e Policisë së Tiranës ka administruar dëshminë e vajzës së dhënë në prani të psikologes. E mitura i ka qëndruar deklarimit të saj se, gjithçka e ka bërë vetëm se ishte privuar nga pjesa tjetër e shoqërisë për të shkuar te ditëlindja e shoqes së saj të ngushtë. Ndërkohë dëshmi kanë dhënë edhe persona të tjerë, por që më pas janë lënë të lirë. /
Burimi: ABC News Albania
Për të lënë një koment ju duhet të jeni regjistruar Identifikohu