Situata alarmante e shkaktuar në vend si pasojë e tërmetit të fuqishëm 6.4 ballë të shkallës Rihter dhe pasgoditjeve ka pezulluar përkohësisht procesin mësimor, ndërsa disa shkolla rezultojnë të dëmtuara. Lidhur me situatën ka reaguar edhe ministrja e Arsimit, Rinisë dhe Sporteve, Besa Shahini.

Gjatë mbledhjes së jashtëzakonshme të Qeverisë, Shahini tha se janë identifikuar të gjitha shkollat që kanë pësuar dëmtime në qarkun Tiranë, Durrës dhe Lezhë. Shahini theksoi se si datë të nisjes së procesit mësimor do ketë parasysh dy opsione.

“Ka nevoje per pak kohe per riparimin e shkollave, është identifikuar numri i atyre institucioneve që kanë pasur dëme. Në 26 nëntor drejtorët e shkollave apo dhe të drejtorive Arsimore kanë identifikuar numrin e shkollave e që kanë paraqitur ndonjë shqetësim. Më 27 nëntor inspektorët kanë bërë inspektime dhe më 28-29 inxhinierë nga Kosova kanë inspektuar shkolla, Në Tiranë, Durrës Lezhë. Më 30 nëntor kemi bërë analizën mbi situatën në fjalë. Nuk mendoj se në Durrës se në qarkun Durrës është koha që të fillojmë të hënën. Edhe Tirana dhe Lezha kanë nevojë për disa rregullime. Kemi dy opsione për nisjen e procesit të shkollës”, tha Shahini.