Pothuajse një vit më parë, në 18 qershor të vitit që lamë pas, moderatorja Jonida Vokshi dhe bashkëshorti i saj Besnik Krapi u bënë prindër për herë të parë, duke sjellë në jetë një vogëlushe, të cilës i vendosën emrin Emi.

Është bërë afro një vit që ajo ka zbukuruar jetën e mamit e të babit, por edhe rrjetet tona sociale, me foto të ndryshme përgjatë rritjes së saj.

Së fundmi Jonida ka qenë e ftuar në emisionin “E ardhmja është vajzë”, ku rrëfeu momentin e saj më të lumtur njëkohësisht dhe më të vështirin, ardhjen në jetë të së bijës.  Mes lotësh, ajo përshkroi çastin kur po sillte në jetë vogëlushen e saj.

“Në momentin që Emi po tentonte të vinte në këtë botë dhe unë mes gjithë vështirësive për ta ndihmuar dëgjoj që doktoresha ime tha që Emit i ishte lidhur kordoni. Ishte e vështirë të dilte sepse ishte kordoni që e tërhiqte sërish dhe mbaj mend që doktoresha më thoshte se është gjithçka në dorën tënde.

Në kokën time non stop qarkullonte vetëm ideja a do të mundem. Aty kam kuptuar se çfarë do të thotë që jeta jote është më e parëndësishme. Por ja dola dhe kur e kam dëgjuar të qajë, të paktën ajo që kemi ne në dorë të bëjmë maksimumin. Thjesht na ngelet të shpëtojmë një njeri me aq sa mundemi. Kur e shoh tani jam njeriu më i lumtur në botë”, – rrëfeu mes lotësh Jonida.