Hepatiti B është një infeksion serioz që prek mëlçinë dhe që shpesh nevojiten disa muaj për t’u shfaqur simptomat e para.

Shenjat që mund të shfaqen janë:

Lodhje, këputje e përgjithshme, temperaturë, dhimbje kokje, humbje oreksi, të vjella, diarre ose kapsllëk, dhimbje muskujsh dhe kyçesh, dhimbje dhe ndjeshmëri tek mëlçia, si edhe verdhëza. Në disa raste nuk jep shenja.

Si transmetohet ky infeksion?

• Me anën e marrëdhënieve seksuale të pambrojtura me dikë që është i prekur nga ky virus;
• Nëse keni një sëmundje seksualisht të transmetueshme si klamidia;
• Përdorni të njëjtën shiringë me dikë tjetër gjatë një injeksioni;
• Përdorni briskun e dikujt tjetër apo furçën e dhëmbëve;
• Nga nëna tek fëmija.

Transmetimi i virusit nga nëna tek fëmija mund të parandalohet me anën e vaksinave dhe trajtimeve për të porsalindurin. Nëse nuk vaksinohet fëmija do të zhvillojë një infeksion kronik që mund të shkaktojë probleme serioze në shëndetin e tij (dëme në mëlçi, kancer në mëlçi, në disa raste edhe vdekjen).

Si trajtohet?

Trajtimi mund të përfshijë marrjen e një doze të caktuar vaksinash, si edhe imunoglobulinave, të cilat janë një preparat antikorpesh që luftojnë virusin dhe ofrojnë mbrojtje të menjëhershme deri në momentin që do të merret vaksina. Këto trajtime do të kenë efekt më të mirë nëse merren 48 orë pas kontaktit me personin mbartës të virusit.