• Pozicioni tradicional i mbajtjes së foshnjës

Mbajeni foshnjën në krahun e gjirit dhe mbështetjani kokën në gropën e bërrylit tuaj, koka dhe trupi duhet të jenë  në një bosht. Dora tjetër e nënës mbështet gjirin, derisa foshnja ta kapë mirë atë, pastaj mund të hiqet dhe të mbështesë trupin e tij. Për foshnjat e porsalindura apo rastet e fryrjes së gjirit këshillohet pozicioni i mbajtjes së trupit të foshnjës me krahun e kundërt të gjirit sepse i mundëson nënës të mbështesë më mirë gjirin me dorën tjetër.

• Pozicioni shtrirë

Pozicioni shtrirë është më i mirë për ushqyerjen gjatë natës si edhe për nënat që kanë lindur me operacion. Në këtë rast, kthehuni në krahun e dhënies së qumështit dhe sigurohuni që foshnja të jetë pozicionuar mirë.

• Pozicioni nën sqetull

Pozicioni nën sqetull është vecanërisht i dobishëm për të porsalindurit me peshë të ulët në lindje apo në rastet e fryrjes së gjirit.

• Ushqyerja me gji e binjakëve

Në rastin e binjakëve, nëna mund t’i ushqejë në të njëjtën kohë të dy, duke i pozicionuar të mbështetur mbi jastëkë. Foshnjat mund të vendosen edhe në pozicione të tjera mjafton të jenë rehat dhe thithja të jetë e mirë.