Sigurisht që është situatë e vështirë momenti kur fëmija e mbyll gojën sa herë i afrohet luga apo e pështyn ushimin që ka brenda saj, por ju duhet të dini se në një moment të tillë nuk duhet të nervozoheni apo t’i bërtisni fëmijës tuaj, përkundrazi duhet të ruani qetësinë sa më shumë të jetë e mundur. Fëmija është shumë i ndjeshëm dhe për pasojë mund të kuptojë tensionin e nënës, gjë e cila mund të bëjë që ai të refuzojë më keq ushqimin që jeni duke i dhënë, duke krijuar kështu një rreth vicioz që mund të bëhet tepër i vështirë për t’u çarë.
Ju duhet të dini se njohja e shijeve të reja, kontakti me lugën dhe mbi të gjitha kalimi nga krahët e nënës në karriken e ushqyerjes, provokon shpesh tek fëmija një reagim refuzues ndaj ushqimit. Për ta bërë sa më të lehtë këtë proçes mund të filloni duke e ushqyer fëmijën në krahun tuaj ose duke i dhënë në dorë një lugë plastike me ngjyrë, në mënyrë që të ketë mundësi të njihet me këtë objekt. Nuk duhet absolutisht të dorëzoheni gjatë refuzimeve që fëmija bën dhe t’i ofroni qumësht në mënyrë që të mos jetë i paushqyer. Nëse do të bëni këtë veprim fëmija do ta ketë edhe më të vështirë të mësohet me ushqimet e ngurta. Gjatë ditëve të para mund t’ja jepni fëmijës ushqimin me biberon me tapë të gjerë. Kjo do të jetë një mënyrë e mirë për ta mësuar atë me shijet e reja, duke e bërë atë që të mësohet si filim me to dhe më pas të kalojë “traumën” e lugës.
Për të lënë një koment ju duhet të jeni regjistruar Identifikohu