Pas lindjes së fëmijës jeta e një gruaje nuk do të jetë më si më parë, dhe fillimisht ajo do të ndiejë njëfarë vështirësie në lidhje me përshtatjen apo organizimin e ditës, duke u bazuar tek nevojat e fëmijës. Gjërat e reja që do të shfaqen para nënës do të jenë të shumta dhe do të mbartin brenda vetes edhe njëfarë kompleksiteti. Për nëna të ndryshme vështirësitë do të jenë të ndryshme, dhe për të zbuluar këtë kemi trajtuar në “Koha të bisedojmë”, gjatë ditës së enjte, pikërisht temën që na lejon të njihemi me to.

Cilat kanë qënë vështirësitë që nënat kanë ndeshur gjatë prindërimit?

Ashtu siç e theksuam edhe më sipër, nëna të ndryshme kanë hasur vështirësi të ndryshme!

• Problemin më të madh e kam pasur kur vajza donte gjumë por nuk flinte dot nga dhimbjet e veshit. Ndihesha e pafuqishme për ta ndihmuar.
• Unë e kam ndier vështirësinë më të madhe kur e kisha djalin 2 muajsh dhe bashkëshorti u largua jashtë vendit për të punuar. Isha vetëm fare!
• Personalisht pata një lindje të parakohshme dhe kisha frikë nga ajo që do të vinte ditën e nesërme. A do të ishte bebi mirë? Pse duhej të ndodhte kështu? Cilat do të ishin ato gjëra që mund të kisha bërë ndryshe? Pata edhe shumë probleme me kapjen e gjirit!
• Gjidhënia për mua është pjesa më e vështirë deri tani dhe madje më duket edhe më e vështirë se vetë shtatzania. Pse nuk flasin mjaftueshëm për këtë? Dhimbja që kisha dhe këshillat e gabuara më orientuan  drejt formulës dhe mendoj që ky ka qënë gabimi më i madh që kam bërë.
• Mendoj se një nga vështirësitë më të mëdha që kam hasur ka qënë depresioni post partum.
• Personalisht pata probleme me gjumin e vajzës e cila flinte deri në  oren 23:00 dhe më pas zgjohej dhe fillonte me të qarat. Ishte e tmerrshme kur të gjithë flinin dhe unë nuk mundesha. Më pas u mësova me atë situatë.
• E kam djalin 4 muajsh dhe e shtrova në spital me bronshit. Gjithashtu njëherë farmacistja më ngatërroi shurupin dhe djali qante pa pushim.
• Mendoj se karvani i vështirësive është i gjatë: refluksi, pagjumësia, defekimi, gjiri, pesha pas lindjes, vaksinat, dalja e dhëmbëve e shumë e shumë të tjera.
• Vështirësia më e madhe për mua ka qënë kur i kam bërë djalit vaksinën e 2 mujorit dhe vetëm qante. Isha në ankth pasi nuk kapte as gjoksin dhe këmba ishte fryrë dhe nxehur mendoja vetëm si mund ta qetësoja.
• Djali im ka probleme me ushqyerjen. Kjo për mua është sfida më e madhe pasi rri me orë të tëra për të ngrënë ushqim.
• Vështirësia më e madhe për mua është tani që e kam 24 muajsh dhe duhet t’i heq bebelinën. Ai nuk bindet fare!

Të jesh një nënë e re sigurisht që ka përpara shumë të papritura dhe vështirësi, por ndonjëherë me informacionin e duhur, disa gjëra mund të përballohen më me lehtësi. Për shembull:

• Nëse do të keni probleme me kolikat e bebes atëherë do të ishte mirë të hiqnit dorë nga përdorimi i kamomilit apo finokut, të cilët ndikojë negativisht në gjidhënie duke qënë se e ngopin fëmijën. Në vend të kësaj këshillohen masazhet e barkut, vendosja e napave të ngrohta etj.
• Në momentin që fëmija ka probleme me refluksin ju nuk duhet të drejtoheni menjëherë tek medikamentet, të cilat nuk bëjnë gjë tjetër vetëm sa prishin ekuilibrin e aciditetit të stomakut. Refluksi është shumë normal për bebet e vogla të cilët e kanë ende jo të maturuar mirë pjesën e ezofagut dhe për pasojë ushqimi kthehet prapa. Në këtë rast do t’ju këshillonim të ushqenit fëmijën në pozicion vertikal, pra koka të qëndrojë më lart trupit, ta bëni të gromësijë shpesh gjatë pirjes etj.
• Është normale që fëmija të ketë probleme me gjumin gjatë muajve të parë të jetës. Këtë nuk e ndryshoni dot, por mund të ndiqni një rutinë të përditshme në mënyrë që fëmija të mësohet dalëngadalë me të. Ndërkohë ju këshillojmë që në mbremje t’i bëni një masazh si dhe gjatë ditës të flini sa herë fëmija fle.
• Gjidhënia! E si mund të funksionojë ajo në mënyrën e duhur nëse filloni t’i prezantoni fëmijës direkt pas lindjes biberonin? Këtu nuk është faji juaj! Ju jeni një nënë e re dhe pa eksperiencë, që druheni para të gjithë veprimeve që bëni, duke menduar se nuk jeni duke e bërë si duhet. Por nëse merrni një “këshillë” për të filluar formulën, injorojeni dhe vazhdoni me gjirin. Stomaku i fëmijës është shumë i vogël dhe kulloshtra është mëse e mjaftueshme. Më pas, me thithjen e rregullt dhe ushqimet e duhura do të prodhohet më tepër qumësht. Nëse fëmija nuk po rritet si duhet, mjeku më pas vendos si do të veproni me ushqyerjen artificiale.

 

')}