Foshnja e sapolindur është në gjendje që të kryejë një sërë veprimesh. Ai fillon ta njohë botën shumë më herët nga sa mendohej më parë. Foshnja e sapo ardhur në jetë është gati të mësojë që në minutat e para të jetës dhe fillon të tërheqë vëmëndjen e të rriturve në mënyrë të qëllimshme për nevojat që ka.

Gjatë javëve të para, i porsalinduri kalon në disa gjendje:

• Rri zgjuar. Foshnja lëviz në mënyrë të vazhdueshme me gjithë trupin, sytë i mban të hapura dhe frymëmarjen e ka të çrregullt.
• Ajo bebe që qan bën lëvizje të çorganizuara dhe të fuqishme të këmbëve dhe duarve. E qara interpretohet ne mënyra të ndryshme: atë të urisë, të zemërimit, të dhimbjes apo të parehatisë.
• Rri me sy hapur. Foshnja i mban sytë plot shkëlqim të hapur dhe ndjek lëvizjet e objekteve apo njerëzve, ndërkohë që rri thuajse pa lëvizur, me fytyrë të qetë.
• Përgjumet. Fëmija i përgjumur hap dhe mbyll sytë, frymëmarjen e ka të rregullt, por pak më e shpejtë sesa në gjumin e thellë, ndërsa sytë i humbasin shkëlqimin dhe janë të perënduar.
• Bën gjumë të rregullt. Sytë e foshnjës mbyllen dhe trupi lëshohet plotësisht, frymëmarrja ngadalësohet, por mbetet e rregullt, fytyra është e qetë dhe kokërdhokët e syrit të palëvizshëm.
• Nuk fle i qetë. Sidomos në fazën REM gjatë së cilës sytë e foshnjës janë të mbyllura, por kokërdhokët lëvizin, foshnja qesh ose ngryset në gjumë, gjymtyrët i lëvizin, frymëmarjen e ka të çrregullt dhe të shpejtë. Lëvizja e shpejtë e syve mund të tregojë se foshnja mund të jetë duke parë endërr, pasi foshnjat shohin ëndrra. Fëmija në këtë fazë ka tendencën të zgjohet dhe fillojë të grindet.

I përmendëm këto gjendje pasi reagimi i bebes ndaj jush varet nga gjendja në të cilën ndodhet. Në fillim, ai kalon pjesën më të madhe të kohës në gjumë, të rregullt dhe të parregullt. Më pas, raporti ndryshon. Nga java e tetë, foshnja fle më tepër natën se ditën, kalon një kohë më të madhe në gjendje zgjuar dhe reagon më shumë ndaj njerëzve përreth. Rreth moshës 4 muajshe, fëmija fillon të flejë më qetë gjatë natës.

Lexoni edhe: Bebi zbulohet gjate nates? Ja si ta mbani ngrohte!