Përbërësit e bakllavasë turke

• 1 kg  miell;
• 7 vezë (4 të  plota dhe 3 vetëm të verdhat);
• 1 gotë uji me vaj;
• 1 gotë uji me kos ;
• Pak lëng limoni;
• 600  gr  gjalpë për lyerjen e bakllavasë;
• 750 gr arra të qërruara;
• Niseshte  për  hapjn e petëve.

Si të përgatisim bakllava turke?

Marrim miellin, vezët, kosin, vajin  dhe lëngun e limonit dhe  zëmë brumin jo shumë  të fortë. Pasi e zëmë brumin e lëmë të qetësohet për gati një orë dhe më pas e ndajmë në 4 pjesë të barabarta.

Secilën nga këto pjesë e bëjmë kulecë të vegjël sa një kokërr arre. Nga secila pjesë do të dalin 20-22 kuleçë.

I hapim petët jo shumë të mëdha dhe i vendosim njera mbi tjetrën duke i lyer me pak niseshte. Pasi i mbarojmë së hapuri të gjitha dhe i kemi vendosur mbi njëra-tjetrën.

Hapim petën e madhe (nga bashkimi i të gjitha petëve të vendosura mbi njëra-tjetrën) sa madhësia e tepsisë dhe i vendosim në tepsi të lyer me vaj dhe më pas petën që kemi vendosur në tepsi e lyejmë me gjalpë dhe hedhim arrat e qëruara dhe të shtypura (brenda arrave, sipas dëshirës mund të hedhim edhe pak kanellë). Ashtu siç vepruam me pjesën e parë të brumit, do të vazhdojmë edhe me pjesët e tjera, ku secilës pjesë i hedhim arrat në mes.

Pasi ta kemi përfunduar të gjithë brumin dhe ta kemi vendosur në tepsi, e presim dhe formë ylli (jo feta shumë të medha) dhe e lyejmë me gjalpë. Tepsinë që kemi e fusim në furrë. Në fillim temperatura duhet të jetë 150 gradë, dhe në momentin që do të fillojë të skuqet pjesa e sipërme e ulim temperaturën në 100 gradë. Proçesi i pjekjes duhet të vazhdojë për 4-4.5 orë  me qëllim që bakllavaja të kullojë sa më mirë.

Sherbeti për bakllavanë turke

Përbërësit

• 1.5 kg sheqer;
• ½ limon (lëngun);
• 1 lt ujë.

Përgatitja

Në një tenxhere sheqerin dhe ujin dhe e vendosim  të  ziej derisa të trashet  sherbeti (e provojmë  tek  thoi i madh i dorës dhe nëse qëndron sumbull është  gati ). Sherbeti nuk hidhet direkt nga zjarri. Atë duhet ta lemë 5 min pastaj ja hedhim.Bakllavaja duhet të  jetë e ftohtë në momentin që do t’i hidhet sherbeti.

Shënim: Nëse arrave nuk ju keni hedhur kanellë mund t’ja hidhni sherbetit. Ju bëftë mirë dhe gëzuar për shumë vjet!

Lexo edhe: Bajame te karamelizuara