Fëmijët nuk duhet të përdorin smartfonë dhe tableta gjatë ngrënies dhe para se të flenë për asnjë arsye. Për fëmijët që nuk kanë mbushur ende dy vjeç, ndalimi i përdorimit të telefonave dhe tabletave është absolut, pa përjashtim. Për ata më të mëdhenj në moshë, pra midis 2 dhe 5 vjeç, përdorimi duhet të kufizohet në një orë në ditë më së shumti, ndërsa kufiri mund të rritet deri në dy orë në ditë për fëmijët që janë midis 5 dhe 8 vjeç. Këto janë paralajmërimet e mjekëve pediatër në Itali, të cilët kanë dhënë alarmin për përdorimin e tepërt të telefonave smart, tabletave dhe kompjuterave për fëmijët e moshës 0 deri në 8 vjeç.
Përdorim i tepërt
Në një studim të bërë së fundmi në Itali 8 nga 10 fëmijë të moshave nga 3 deri në 5 vjeç janë në gjendje të përdorin telefonat smart të prindërve, ndërsa këta të fundit janë shpesh shumë tolerantë. Madje 30% e tyre e përdorin këtë pajisje për të qetësuar fëmijën gjatë vitit të parë e jetës, dhe 70% e tyre e përdorin në vitin e dytë të fëmijës.
Mendimi i ekspertëve
Për të shpjeguar rreziqet që mund të lindin për shkak të një përdorimi të tepërt të tabletave presidenti i Sip (Shoqata italiane e pediatrisë) Alberto Villani, tha se përdorimi i pajisjeve të reja elektronike dhe internet nuk shkon ekzagjeruar, dhe vendosja e limiteve është vendimtare pasi vitet e fundit po ndodh “një përdorim i tepruar i smartfonëve dhe tabletave nga të miturit, duke arritur shpesh nga 8 deri në 10 orë në ditë”.
Rreziqet jo vetëm psikologjike
Shpenzimi i shumë orëve para telefonave apo tabletave mund të shkaktojë dëme serioze si nga pikëpamja psikologjike edhe nga ajo fizike, të cilat nuk duhen nënvlerësuar. Lidhja që krijohet mes fëmijës dhe këtyre pajisjeve teknologjike mund të shkaktojë të gjitha llojet e dëmeve, nga probleme të të mësuarit deri në refuktim të sferës imagjinative të fëmijës. Pa marrë në konsideratë këtu dëmet fizike ku rritet rreziku për probleme me shikimin, dëgjimin, ritmin e gjumit, dhe shkaktohen probleme serioze me obezitetin.
Prindërit e pavetëdijshëm
Prindërit, sipas SIP janë shpesh të pavetëdijshëm për rreziqet për shëndetin mendor dhe fizik që mund të rezultojë nga një përdorim i hershëm tek fëmijë të pajisjeve dixhitale. Për këtë arsye para se të jetë shumë vonë ata duhet të vendosin rregulla që do t’i ndihmojnë të ndërtojnë një marrëdhënie të shëndetshme mes fëmijëve dhe teknologjive të reja.
Lexoni edhe: Mos ia jepni telefonin femijes perpara kesaj moshe
Për të lënë një koment ju duhet të jeni regjistruar Identifikohu